(COPY)「攝影入門」o既書

如果大家去搵d「攝影入門」o既書,
o向十本入面,都未必搵到一頁係教人打斜影.
黃金分割法,三分之一構圖等.
正正因為「打斜o既對角線構圖方法, 會予人一種不平衡, 不安o既感覺」,
係用o黎表達一種特別o既感覺,或特出一種特別o既意境.

不過,如果再睇多d「攝影進階」o既書,
其實黃金分割法等都有進一步o既變化.

舉個例子,如果想影一張寫實o既相片,
去表達國金大廈o既外觀,可以打直影,
之前見有位師兄用小黑五o向尖沙咀影過去,
一座四平八穩o既國金大廈出到o黎,好靚,
如果打斜,就好似影相o個個人影得唔好.
如果想突顯國金大廈全港最高o既o個種氣勢,
就可以用超廣角鏡o向國金大廈底影上去,
大廈斜晒,但反而突顯出大廈o既宏偉氣勢.
當然,仲有好多構圖方法!!!

不過,有個重點係,師兄提到o既：
「不宜濫用, 否則睇完成輯相, 全部打斜, 睇完真係會頭暈暈」

打斜影,應該係有目的o既!!!
有d人影相,見枝鏡唔夠wide,影唔晒個背景,
又唔行後幾步,又唔用low angle,偏要打斜.
結果張張相都係向右斜,向左斜......
最慘係,呢種係無目的o既斜,卻無突顯一d特別o既感受.
放入相簿睇,真係要將本相簿"另"o黎"另"去......頭都暈.

我見好多回應都話打斜影無問題,
但驚有d初學影相o既朋友上到o黎見到,
會誤以為呢度鼓勵人打斜影.
但打斜影其實算係「攝影進階」,
打斜影都有一定o既構圖規則及理念.
初學o既朋友千祈唔好「濫用」.
注意：可以多作嘗試,但不要「濫用」.

我諗o個個店舖職員,都係善意提醒o者,
佢可能當正你係從來未影過相,完全唔識o既初學者,
先俾咁o既建議你唔好打斜影o者.
即係等於：
所有初學樂器o既人,老師都會叫佢o地練好拍子,
無一個樂器老師會一開始就叫佢o地隨心所欲亂彈.
所有初學打波o既人,教練都會叫佢o地練好基本運球,
唔會一開始就係咁教花式.
如果學生一開始就唔跟拍子單憑感覺去彈琴,
或者唔好好練習運球,專去模仿人玩花式走籃,
相信所有教練都會被激到發嬲.
但當然,如果個學生已經有一定的基礎,
無人可以話唔可以憑感覺去彈琴,打波玩花式.
事實上,就係憑感覺去彈琴,先可以達到最高境界,
打波入球兼玩埋花式,先最能夠搏得最多掌聲.

影相一樣,先學好構圖o既基本理論,
熟習左,再慢慢尋求變化.
之前幾個回應入面,師兄們post左好多打斜o既相,
呢d相都係好有水準o既相,
每張打斜o黎影,都可以突顯到獨特o既感覺,
打斜o既背後係有一套「規則」的.
「初學者」應該「小心運用」,亦可多作嘗試,但不宜「濫用」.